ਦਸਮ ਗਰੰਥ । दसम ग्रंथ ।

Page 358

ਅਥ ਊਧੋ ਬ੍ਰਿਜ ਭੇਜਾ ॥

अथ ऊधो ब्रिज भेजा ॥

ਸਵੈਯਾ ॥

सवैया ॥

ਸੋਵਤ ਹੀ ਇਹ ਚਿੰਤ ਕਰੀ; ਬ੍ਰਿਜ ਬਾਸਨ ਸਿਉ ਇਹ ਕਾਰਜ ਕਈਯੈ ॥

सोवत ही इह चिंत करी; ब्रिज बासन सिउ इह कारज कईयै ॥

ਪ੍ਰਾਤ ਭਏ ਤੇ ਬੁਲਾਇ ਕੈ ਊਧਵ; ਭੇਜ ਕਹਿਯੋ ਤਿਹ ਠਉਰਹਿ ਦਈਯੈ ॥

प्रात भए ते बुलाइ कै ऊधव; भेज कहियो तिह ठउरहि दईयै ॥

ਗ੍ਵਾਰਨਿ ਜਾਇ ਸੰਤੋਖ ਕਰੈ ਸੁ; ਸੰਤੋਖ ਕਰੈ ਹਮਰੀ ਧਰਮ ਮਈਯੈ ॥

ग्वारनि जाइ संतोख करै सु; संतोख करै हमरी धरम मईयै ॥

ਯਾ ਤੇ ਨ ਬਾਤ ਭਲੀ ਕਛੁ ਅਉਰ ਹੈ; ਮੋਹਿ ਬਿਬੇਕਹਿ ਕੋ ਝਗਰਈਯੈ ॥੮੯੩॥

या ते न बात भली कछु अउर है; मोहि बिबेकहि को झगरईयै ॥८९३॥

ਪ੍ਰਾਤ ਭਏ ਤੇ ਬੁਲਾਇ ਕੈ ਊਧਵ; ਪੈ ਬ੍ਰਿਜ ਭੂਮਹਿ ਭੇਜ ਦਯੋ ਹੈ ॥

प्रात भए ते बुलाइ कै ऊधव; पै ब्रिज भूमहि भेज दयो है ॥

ਸੋ ਚਲਿ ਨੰਦ ਕੇ ਧਾਮ ਗਯੋ; ਬਤੀਯਾ ਕਹਿ ਸੋਕ ਅਸੋਕ ਭਯੋ ਹੈ ॥

सो चलि नंद के धाम गयो; बतीया कहि सोक असोक भयो है ॥

ਨੰਦ ਕਹਿਯੋ ਸੰਗਿ ਊਧਵ ਕੇ; ਕਬਹੂੰ ਹਰਿ ਜੀ ਮੁਹਿ ਚਿਤ ਕਯੋ ਹੈ? ॥

नंद कहियो संगि ऊधव के; कबहूं हरि जी मुहि चित कयो है? ॥

ਯੌ ਕਹਿ ਕੈ ਸੁਧਿ ਸ੍ਯਾਮਹਿ ਕੈ; ਧਰਨੀ ਪਰ ਸੋ ਮੁਰਝਾਇ ਪਯੋ ਹੈ ॥੮੯੪॥

यौ कहि कै सुधि स्यामहि कै; धरनी पर सो मुरझाइ पयो है ॥८९४॥

ਜਬ ਨੰਦ ਪਰਿਯੋ ਗਿਰ ਭੂਮਿ ਬਿਖੈ; ਤਬ ਯਾਹਿ ਕਹਿਯੋ ਜਦੁਬੀਰ ਅਏ ॥

जब नंद परियो गिर भूमि बिखै; तब याहि कहियो जदुबीर अए ॥

ਸੁਨਿ ਕੈ ਬਤੀਯਾ ਉਠਿ ਠਾਂਢ ਭਯੋ; ਮਨ ਕੇ ਸਭ ਸੋਕ ਪਰਾਇ ਗਏ ॥

सुनि कै बतीया उठि ठांढ भयो; मन के सभ सोक पराइ गए ॥

ਉਠ ਕੈ ਸੁਧਿ ਸੋ ਇਹ ਭਾਂਤਿ ਕਹਿਯੋ; ਹਮ ਜਾਨਤ ਊਧਵ ਪੇਚ ਕਏ ॥

उठ कै सुधि सो इह भांति कहियो; हम जानत ऊधव पेच कए ॥

ਤਜ ਕੈ ਬ੍ਰਿਜ ਕੋ ਪੁਰ ਬੀਚ ਗਏ; ਫਿਰਿ ਕੈ ਬ੍ਰਿਜ ਮੈ ਨਹੀ ਸ੍ਯਾਮ ਅਏ ॥੮੯੫॥

तज कै ब्रिज को पुर बीच गए; फिरि कै ब्रिज मै नही स्याम अए ॥८९५॥

ਸ੍ਯਾਮ ਗਏ ਤਜਿ ਕੈ ਬ੍ਰਿਜ ਕੋ; ਬ੍ਰਿਜ ਲੋਗਨ ਕੋ ਅਤਿ ਹੀ ਦੁਖੁ ਦੀਨੋ ॥

स्याम गए तजि कै ब्रिज को; ब्रिज लोगन को अति ही दुखु दीनो ॥

ਊਧਵ ! ਬਾਤ ਸੁਨੋ ਹਮਰੀ; ਤਿਹ ਕੈ ਬਿਨੁ ਭਯੋ ਹਮਰੋ ਪੁਰ ਹੀਨੋ ॥

ऊधव ! बात सुनो हमरी; तिह कै बिनु भयो हमरो पुर हीनो ॥

ਦੈ ਬਿਧਿ ਨੈ ਹਮਰੇ ਗ੍ਰਿਹ ਬਾਲਕ; ਪਾਪ ਬਿਨਾ, ਹਮ ਤੇ ਫਿਰਿ ਛੀਨੋ ॥

दै बिधि नै हमरे ग्रिह बालक; पाप बिना, हम ते फिरि छीनो ॥

ਯੌ ਕਹਿ ਸੀਸ ਝੁਕਾਇ ਰਹਿਯੋ; ਬਹੁ ਸੋਕ ਬਢਿਯੋ, ਅਤਿ ਰੋਦਨ ਕੀਨੋ ॥੮੯੬॥

यौ कहि सीस झुकाइ रहियो; बहु सोक बढियो, अति रोदन कीनो ॥८९६॥

ਕਹਿ ਕੈ ਇਹ ਬਾਤ ਪਰਿਯੋ ਧਰਿ ਪੈ; ਉਠਿ ਫੇਰਿ ਕਹਿਯੋ ਸੰਗ ਊਧਵ ਇਉ ॥

कहि कै इह बात परियो धरि पै; उठि फेरि कहियो संग ऊधव इउ ॥

ਤਜਿ ਕੈ ਬ੍ਰਿਜ ਸ੍ਯਾਮ ਗਏ ਮਥੁਰਾ; ਹਮ ਸੰਗ ਕਹੋ ਕਬ ਕਾਰਨਿ ਕਿਉ ॥

तजि कै ब्रिज स्याम गए मथुरा; हम संग कहो कब कारनि किउ ॥

ਤੁਮਰੇ ਅਬ ਪਾਇ ਲਗੋ ਉਠ ਕੈ; ਸੁ ਭਈ ਬਿਰਥਾ, ਸੁ ਕਹੋ ਸਭ ਜਿਉ ॥

तुमरे अब पाइ लगो उठ कै; सु भई बिरथा, सु कहो सभ जिउ ॥

ਤਿਹ ਤੇ ਨਹੀ ਲੇਤ ਕਛੂ ਸੁਧਿ ਹੈ; ਮੁਹਿ ਪਾਪਿ ਪਛਾਨਿ, ਕਛੂ ਰਿਸ ਸਿਉ ॥੮੯੭॥

तिह ते नही लेत कछू सुधि है; मुहि पापि पछानि, कछू रिस सिउ ॥८९७॥

ਸੁਨਿ ਕੈ ਤਿਨ ਊਧਵ ਯੌ ਬਤੀਯਾ; ਇਹ ਭਾਤਨਿ ਸਿਉ ਤਿਹ ਉਤਰ ਦੀਨੋ ॥

सुनि कै तिन ऊधव यौ बतीया; इह भातनि सिउ तिह उतर दीनो ॥

ਥੋ ਸੁਤ ਸੋ ਬਸੁਦੇਵਹਿ ਕੋ; ਤੁਮ ਤੇ ਸਭ ਪੈ ਪ੍ਰਭ ਜੂ ਨਹੀ ਛੀਨੋ ॥

थो सुत सो बसुदेवहि को; तुम ते सभ पै प्रभ जू नही छीनो ॥

ਸੁਨਿ ਕੈ ਪੁਰਿ ਕੋ ਪਤਿ ਯੌ ਬਤੀਯਾ; ਕਬਿ ਸ੍ਯਾਮ ਉਸਾਸ ਕਹੈ ਤਿਨ ਲੀਨੋ ॥

सुनि कै पुरि को पति यौ बतीया; कबि स्याम उसास कहै तिन लीनो ॥

ਧੀਰ ਗਯੋ ਛੁਟਿ ਰੋਵਤ ਭਯੋ; ਇਨ ਹੂੰ ਤਿਹ ਦੇਖਤ ਰੋਦਨ ਕੀਨੋ ॥੮੯੮॥

धीर गयो छुटि रोवत भयो; इन हूं तिह देखत रोदन कीनो ॥८९८॥

ਹਠਿ ਊਧਵ ਕੈ ਇਹ ਭਾਂਤਿ ਕਹਿਯੋ; ਪੁਰ ਕੇ ਪਤਿ ਸੋ ਕਛੁ ਸੋਕ ਨ ਕੀਜੈ ॥

हठि ऊधव कै इह भांति कहियो; पुर के पति सो कछु सोक न कीजै ॥

ਸ੍ਯਾਮ ਕਹੀ ਮੁਹਿ ਜੋ ਬਤੀਯਾ; ਤਿਹ ਕੀ ਬਿਰਥਾ ਸਭ ਹੀ ਸੁਨਿ ਲੀਜੈ ॥

स्याम कही मुहि जो बतीया; तिह की बिरथा सभ ही सुनि लीजै ॥

ਜਾ ਕੀ ਕਥਾ ਸੁਨਿ ਹੋਤ ਖੁਸੀ ਮਨ; ਦੇਖਤ ਹੀ ਜਿਸ ਕੋ ਮੁਖ ਜੀਜੈ ॥

जा की कथा सुनि होत खुसी मन; देखत ही जिस को मुख जीजै ॥

ਵਾਹਿ ਕਹਿਯੋ ਨਹਿ ਚਿੰਤ ਕਰੋ; ਨ ਕਛੂ ਇਹ ਤੇ ਤੁਮਰੋ ਫੁਨਿ ਛੀਜੈ ॥੮੯੯॥

वाहि कहियो नहि चिंत करो; न कछू इह ते तुमरो फुनि छीजै ॥८९९॥

TOP OF PAGE

Dasam Granth