ਦਸਮ ਗਰੰਥ । दसम ग्रंथ । |
Page 244 ਦੋਹਰਾ ॥ दोहरा ॥ ਕੰਸ ਲਵਾਏ ਜਾਤ ਤਿਨਿ; ਸਕਲ ਪ੍ਰਬਲ ਦਲ ਸਾਜਿ ॥ कंस लवाए जात तिनि; सकल प्रबल दल साजि ॥ ਆਗੇ ਤੇ ਸ੍ਰਵਨਨ ਸੁਨੀ; ਬਿਧ ਕੀ ਅਸੁਭ ਅਵਾਜ ॥੩੮॥ आगे ते स्रवनन सुनी; बिध की असुभ अवाज ॥३८॥ ਨਭਿ ਬਾਨੀ ਬਾਚ ਕੰਸ ਸੋ ॥ नभि बानी बाच कंस सो ॥ ਕਬਿਤੁ ॥ कबितु ॥ ਦੁਖ ਕੋ ਹਰਿਨ ਬਿਧ, ਸਿਧਿ ਕੇ ਕਰਨ ਰੂਪ; ਮੰਗਲ ਧਰਨ ਐਸੋ ਕਹਿਯੋ ਹੈ ਉਚਾਰ ਕੈ ॥ दुख को हरिन बिध, सिधि के करन रूप; मंगल धरन ऐसो कहियो है उचार कै ॥ ਲੀਏ ਕਹਾ ਜਾਤ? ਤੇਰੋ ਕਾਲ ਹੈ ਰੇ ਮੂੜ ਮਤਿ ! ਆਠਵੋ ਗਰਭ ਯਾ ਕੋ ਤੋ ਕੋ ਡਾਰੈ ਮਾਰਿ ਹੈ ॥ लीए कहा जात? तेरो काल है रे मूड़ मति ! आठवो गरभ या को तो को डारै मारि है ॥ ਅਚਰਜ ਮਾਨ ਲੀਨੋ, ਮਨ ਮੈ ਬਿਚਾਰ ਇਹ; ਕਾਢ ਕੈ ਕ੍ਰਿਪਾਨ ਡਾਰੋ ਇਨ ਹੀ ਸੰਘਾਰਿ ਕੈ ॥ अचरज मान लीनो, मन मै बिचार इह; काढ कै क्रिपान डारो इन ही संघारि कै ॥ ਜਾਹਿੰਗੇ ਛਪਾਇ ਕੈ, ਸੁ ਜਾਨੀ ਕੰਸ ਮਨ ਮਾਹਿ; ਇਹੈ ਬਾਤ ਭਲੀ ਡਾਰੋ ਜਰ ਹੀ ਉਖਾਰਿ ਕੈ ॥੩੯॥ जाहिंगे छपाइ कै, सु जानी कंस मन माहि; इहै बात भली डारो जर ही उखारि कै ॥३९॥ ਦੋਹਰਾ ॥ दोहरा ॥ ਕੰਸ ਦੋਹੂੰ ਕੇ ਬਧ ਨਮਿਤ; ਲੀਨੋ ਖੜਗ ਨਿਕਾਰਿ ॥ कंस दोहूं के बध नमित; लीनो खड़ग निकारि ॥ ਬਾਸੁਦੇਵ ਅਰੁ ਦੇਵਕੀ; ਡਰੇ ਦੋਊ ਨਰ ਨਾਰਿ ॥੪੦॥ बासुदेव अरु देवकी; डरे दोऊ नर नारि ॥४०॥ ਬਾਸੁਦੇਵ ਬਾਚ ਕੰਸ ਸੋ ॥ बासुदेव बाच कंस सो ॥ ਦੋਹਰਾ ॥ दोहरा ॥ ਬਾਸਦੇਵ ਡਰੁ ਮਾਨ ਕੈ; ਤਾ ਸੋ ਕਹੀ ਸੁਨਾਇ ॥ बासदेव डरु मान कै; ता सो कही सुनाइ ॥ ਜੋ ਯਾ ਹੀ ਤੇ ਜਨਮ ਹੈ; ਮਾਰਹੁ ਤਾਕਹੁ ਰਾਇ ! ॥੪੧॥ जो या ही ते जनम है; मारहु ताकहु राइ ! ॥४१॥ ਕੰਸ ਬਾਚ ਮਨ ਮੈ ॥ कंस बाच मन मै ॥ ਦੋਹਰਾ ॥ दोहरा ॥ ਪੁਤ੍ਰ ਹੇਤ ਕੇ ਭਾਵ ਸੌ; ਮਤਿ ਇਹ ਜਾਇ ਛਪਾਇ ॥ पुत्र हेत के भाव सौ; मति इह जाइ छपाइ ॥ ਬੰਦੀਖਾਨੈ ਦੇਉ ਇਨ; ਇਹੈ ਬਿਚਾਰੀ ਰਾਇ ॥੪੨॥ बंदीखानै देउ इन; इहै बिचारी राइ ॥४२॥ ਅਥ ਦੇਵਕੀ ਬਸੁਦੇਵ ਕੈਦ ਕੀਬੋ ॥ अथ देवकी बसुदेव कैद कीबो ॥ ਸਵੈਯਾ ॥ सवैया ॥ ਡਾਰਿ ਜੰਜੀਰ ਲਏ ਤਿਨ ਪਾਇਨ; ਪੈ ਫਿਰਿ ਕੈ ਮਥੁਰਾ ਮਹਿ ਆਯੋ ॥ डारि जंजीर लए तिन पाइन; पै फिरि कै मथुरा महि आयो ॥ ਸੋ ਸੁਨਿ ਕੈ ਸਭ ਲੋਗ ਕਥਾ; ਅਤਿ ਨਾਮ ਬੁਰੋ ਜਗ ਮੈ ਨਿਕਰਾਯੋ ॥ सो सुनि कै सभ लोग कथा; अति नाम बुरो जग मै निकरायो ॥ ਆਨਿ ਰਖੈ ਗ੍ਰਿਹ ਆਪਨ ਮੈ; ਰਖਵਾਰੀ ਕੋ ਸੇਵਕ ਲੋਗ ਬੈਠਾਯੋ ॥ आनि रखै ग्रिह आपन मै; रखवारी को सेवक लोग बैठायो ॥ ਆਨਿ ਬਡੇਨ ਕੀ ਛਾਡਿ ਦਈ; ਕੁਲ ਭੀਤਰ ਆਪਨੋ ਰਾਹ ਚਲਾਯੋ ॥੪੩॥ आनि बडेन की छाडि दई; कुल भीतर आपनो राह चलायो ॥४३॥ ਕਬਿਯੋ ਬਾਚ ਦੋਹਰਾ ॥ कबियो बाच दोहरा ॥ ਕਿਤਕ ਦਿਵਸ ਬੀਤੇ ਜਬੈ; ਕੰਸ ਰਾਜ ਉਤਪਾਤ ॥ कितक दिवस बीते जबै; कंस राज उतपात ॥ ਤਬੈ ਕਥਾ ਅਉਰੈ ਚਲੀ; ਕਰਮ ਰੇਖ ਕੀ ਬਾਤ ॥੪੪॥ तबै कथा अउरै चली; करम रेख की बात ॥४४॥ ਪ੍ਰਥਮ ਪੁਤ੍ਰ ਦੇਵਕੀ ਕੇ ਜਨਮ ਕਥਨੰ ॥ प्रथम पुत्र देवकी के जनम कथनं ॥ ਦੋਹਰਾ ॥ दोहरा ॥ ਪੁਤ੍ਰ ਭਇਓ ਦੇਵਕੀ ਕੈ; ਕੀਰਤਿ ਮਤ ਤਿਹ ਨਾਮੁ ॥ पुत्र भइओ देवकी कै; कीरति मत तिह नामु ॥ ਬਾਸੁਦੇਵ ਲੈ ਤਾਹਿ ਕੌ; ਗਯੋ ਕੰਸ ਕੈ ਧਾਮ ॥੪੫॥ बासुदेव लै ताहि कौ; गयो कंस कै धाम ॥४५॥ ਸਵੈਯਾ ॥ सवैया ॥ ਲੈ ਕਰਿ ਤਾਤ ਕੋ ਤਾਤ ਚਲਿਯੋ; ਜਬ ਹੀ ਨ੍ਰਿਪ ਕੈ ਦਰ ਊਪਰ ਆਇਓ ॥ लै करि तात को तात चलियो; जब ही न्रिप कै दर ऊपर आइओ ॥ ਜਾਇ ਕਹਿਯੋ ਦਰਵਾਨਨ ਸੋ; ਤਿਨ ਬੋਲਿ ਕੈ ਭੀਤਰ ਜਾਇ ਜਨਾਇਓ ॥ जाइ कहियो दरवानन सो; तिन बोलि कै भीतर जाइ जनाइओ ॥ ਕੰਸ ਕਰੀ ਕਰੁਨਾ ਸਿਸੁ ਦੇਖਿ; ਕਹਿਓ ਹਮ ਹੂੰ ਤੁਮ ਕੋ ਬਖਸਾਇਓ ॥ कंस करी करुना सिसु देखि; कहिओ हम हूं तुम को बखसाइओ ॥ ਫੇਰ ਚਲਿਓ ਗ੍ਰਿਹ ਕੋ ਬਸੁਦੇਵ; ਤਊ ਮਨ ਮੈ ਕਛੁ ਨ ਸੁਖੁ ਪਾਇਓ ॥੪੬॥ फेर चलिओ ग्रिह को बसुदेव; तऊ मन मै कछु न सुखु पाइओ ॥४६॥ ਬਸੁਦੇਵ ਬਾਚ ਮਨ ਮੈ ॥ बसुदेव बाच मन मै ॥ ਦੋਹਰਾ ॥ दोहरा ॥ ਬਾਸੁਦੇਵ ਮਨ ਆਪਨੇ; ਕੀਨੋ ਇਹੈ ਬਿਚਾਰ ॥ बासुदेव मन आपने; कीनो इहै बिचार ॥ ਕੰਸ ਮੂੜ ਦੁਰਮਤਿ ਬਡੋ; ਯਾ ਕੌ ਡਰਿ ਹੈ ਮਾਰਿ ॥੪੭॥ कंस मूड़ दुरमति बडो; या कौ डरि है मारि ॥४७॥ |
Dasam Granth |